ვიზიტი ისრაელში - შეხვედრა აშდოდის ვიცე-მერთან

09.12.2016 საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი და მინისტრის მრჩეველი ქეთევან დუმბაძე სამუშაო ვიზიტით ისრაელში იმყოფებიან. 

8 დეკემბერს, აშდოდში, ქართულ დელეგაციას ქალაქის ვიცე-მერმა მოშე ბოთერაშვილმა უმასპინძლა. შეხვედრას აშდოდში მცხოვრები ქართველი ებრაელები ესწრებოდნენ.

იხილეთ ფოტოგალერეა

მოშე ბოთერაშვილის ინიციატივით, ქალაქ აშდოდში აშენდა ქართველ ებრაელთა კულტურის ცენტრი, რომელიც თავის თავში ქართველ ებრაელთა ისტორიის მუზეუმსაც მოიაზრებს. 

მანანა ბერიკაშვილმა ვიცე-მერს მუზეუმისთვის უსახსოვრა პირველი საჩუქრები: ივრითულ ენაზე თარგმნილი „ ვეფხისტყაოსანი“, მხატვარ ქეთევან მატაბელის ფოლიანტები და კულტურის სამინისტროს მიერ „ვეფხისტყაოსნის“ თემატიკაზე გამოცემული წიგნები.

ქართული დელეგაციის ისრაელში ვიზიტი შოთა რუსთაველის 850 წლის იუბილეს უკავშირდება; ქვეყნის მასშტაბით, სხვადასხვა ქალაქში, ამ თარიღისადმი მიძღვნილი არაერთი ღონისძიება გაიმართება.