საქართველო ჭადრაკში ევროპის ჩემპიონატებს მასპინძლობს

13.03.2018 ​კლასიკურ ჭადრაკში ევროპის ვაჟთა ჩემპიონატის და სწრაფ ჭადრაკში ევროპის ქალთა ჩემპიონატის წარდგენა დღეს სასტუმრო „იოტა“- ში გაიმართა.ღონისძიებას კულტურისა და სპორტის მინისტრის მოადგილე შალვა გოგოლაძე, ევროპის საჭადრაკო კავშირის პრეზიდენტი ზურაბ აზმაიფარაშვილი, კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა და ჭადრაკის ფედერაციის პრეზიდენტი გია გიორგაძე დაესწრნენ.

იხილეთ ფოტოგალერეა

16-28 მარტს ბათუმი ვაჟ მოჭადრაკეთა ევროპის ჩემპიონატს უმასპინძლებს, რომელშიც მონაწილეობას 34 ქვეყნის 311 მოჭადრაკე მიიღებს. საქართველოს სახელით ევროპირველობაზე 30 სპორტსმენი წარდგება.ქართველი ქომაგი განსაკუთრებით დიდ იმედს ევროპის ჩემპიონატის მრავალგზის პრიზიორზე, საქართველოს ეროვნული ნაკრების ლიდერზე ბაადურ ჯობავაზე ამყარებს. ევროპის ჩემპიონატის საპრიზო ფონდი 100 ათასი ევროა. წესების მიხედვით, ვაჟთა ჩემპიონატში ასპარეზობა ქალებსაც შეუძლიათ. აღსანიშნავია, რომ ბათუმი უკვე მეორედ მასპინძლობს კონტინენტის პირვე­­ლობას, პირველად მსგავსი შეჯიბრი 2002 წელს გაიმართა.

30 მარტი -1 აპრილი თბილისი ევროპის ქალთა ჩემპიონატს სწრაფ ჭადრაკში უმასპინძლებს. პირველობისთვის 15 ქვეყნის 80 მოჭადრაკე იბრძოლებს. ჩემპიონატში კონტინენტის ყველა უძლიერესი მოჭადრაკე მიიღებს მონაწილეობას, მათ შორის საჭადრაკო ოლიმპიადების გამარჯვებულები, მსოფლიოსა და ევროპის ჩემპიონები.ფავორიტთა შორის არიან ქართველი ქალები, მათ შორის მსოფლიოს მოქმედი ჩემპიონი ელვისებურ ჭადრაკში ნანა ძაგნიძე, მსოფლიოს 2015 წლის გუნდური ჩემპიონატის გამარჯვებულები: ნინო ბაციაშვილი, ბელა ხოტენაშვილი,ლელა ჯავახიშვილი, სალომე მელია, მერი არაბიძე. ასპარეზობის საპრიზო ფონდი 20 500 ლარს შეადგენს.