რობერტ კობლიაშვილი ბერძნულ-რომაულ ჭიდაობაში ევროპის ჩემპიონია

02.05.2018 საქართველოს ბერძნულ-რომაული სტილით მოჭიდავეთა ნაკრების წევრი რობერტ კობლიაშვილი (87 კგ) ევროპის ჩემპიონია.

რუსეთის ქალაქ კასპიისკიში მიმდინარე ევროპის ჩემპიონატზე ბერძნულ-რომაულ ჭიდაობაში, რობერტ კობლიაშვილმა ფინალურ შეხვედრაში რუსეთის წარმომადგენელი ბეკხან ოზდოევი 3:2 დაამარცხა და ოქროს მედალი მოიპოვა.

ფინალურ შეხვედრამდე, რობერტ კობლიაშვილმა ბულგარელ, შვედ და ბელარუს მოჭიდავეებს სძლია. ევროპის ჩემპიონატის სტარტზე საქართველოს ბერძულ-რომაული სტილით მოჭიდავეთა ნაკრების კიდევ ორმა სპორტსმენმა შეძლო წარმატება - ნუგზარ წურწუმია (55 კგ) და იაკობ ქაჯაია (130 კგ) ბრინჯაოს მედლებს დაეუფლნენ.

2 მაისს, ევროპის ჩემპიონ-პრიზიორები ბერძნულ-რომაული სტილით ჭიდაობის დარჩენილ ხუთ წონით კატეგორიაში: 60, 67, 72, 82 და 97 კილოგრამებში გამოვლინდებიან. წინასწარი და ნახევარფინალური ეტაპის შეხვედრები 1 მაისს გაიმართა და ხუთი ქართველიდან ფინალური ბლოკის საგზური სამმა მოიპოვა.
რიო დე ჟანეიროს ოლიმპიური პრიზიორი შმაგი ბოლქვაძე (67 კგ) ევროპის ჩემპიონატის ფინალში გავიდა, სადაც რუსეთის ნაკრების წევრ არტიომ სურკოვს დაუპირისპირდება. დავით ჩხარტიშვილი (60 კგ) და იური ლომაძე (72 კგ) კი რეპეშაჟის ფინალში იჭიდავებენ.

4-6 მაისს ევროპის ჩემპიონატზე მედლებისთვის თავისუფალი სტილით მოჭიდავეთა ნაკრების წევრები იბრძოლებენ. საქართველოს ნაკრების შემადგენლობაში არიან ოლიმპიური ჩემპიონი ვლადიმერ ხინჩეგაშვილი (65 კგ) და მსოფლიო ჩემპიონები - ზურაბ იაკობაშვილი (70 კგ) და გენო პეტრიაშვილი (125 კგ).