დავით არჩილ სულაკაურის ნამუშევრების გამოფენა

05.07.2017 საქართველოს კულტურისა და ძეგლთა დაცვის სამინისტროს მხარდაჭერით, 5 ივლისს, 18:00 საათზე, ი.გრიშაშვილის სახელობის თბილისის ისტორიის მუზეუმში (მის. სიონის ქუჩა 8) თანამედროვე ქართველი ფერმწერის დავით არჩილ სულაკაურის ნამუშევრების გამოფენა გაიხსნება.

გამოფენაზე წარმოდგენილი იქნება მხატვრის 100-მდე ნამუშევარი და მისი შემოქმედების ამსახველი კატალოგი. ეს პირველი მასშტაბური გამოფენაა, რომელიც მხატვრის დაბადებიდან 65 წლისთავს ეძღვნება.

დავით არჩილ სულაკაურის ნამუშევრების გამოფენის პროექტმა, 2017 წელს, საქართველოს კულტურისა და ძეგლთა დაცვის სამინისტროს მიერ გამოცხადებულ კონკურსში გაიმარჯვა.

თანამედროვე ქართველი ფერმწერის ნამუშევრები თბილისის ისტორიის მუზეუმში 10 სექტემბრამდე იქნება წარმოდგენილი.

დავით არჩილ სულაკაური ქმნის პეიზაჟებს, პორტრეტებს, მრავალფიგურიან კომპოზიციებს, სურათებს რელიგიურ სიუჟეტზე, გრაფიკულ ნამუშევრებს ხელნაკეთ ქაღალდზე. შთამბეჭდავია მისი დაზგური სურათები და მონუმენტური ტილოები, სადაც ერთად ჩნდება ტრადიციაც და ნოვაციაც. ხელოვანი მაქსიმალურად იყენებს ფერის მდიდარ შესაძლებლობებს, მიმართავს ფორმის გამიზნულ დეფორმაციას, სასურათო სიბრტყეს ტვირთავს ძლიერი ემოციური მუხტითა და განცდით.